PACELATHON

Pacelathon iku gunemane/omongane wong loro utawa luwih kanthi takon, mangsuli, prentah lan nanggepi sing digunemake kanthi langsung. Ana ing basa tinulis antarane sing guneman lan sing digunemake dielet-eleti nganggo tandha titik loro, dene sing digunemake kaapit pada pangkat (tandha petik).

Ana ing pacelathon, tembung pitakon iku maneka warna, kayata:

1.                  Apa, kanggo nakokake samubarang.

2.                  Sapa, kanggo nakokake jeneng.

3.                  Pira, kanggo nakokake cacah/jumlah.

4.                  Kapan, kanggo nakokake wayah/wektu.

5.                  Ngendi, kanggo nakokake papan/panggonan.

6.                  Geneya, kanggo nakokake alesann/sebab.

7.                  Kepriye, kanggo nakokake kaanan.

Tuladhane

BADA

Dewi Setyorini lan adhine, Budi Santoso, lagi ana ning pawon. Dewi lagi masak lan Budi lagi ngenteni giliran adus. Wonge kabeh lagi ngomongake acara bada.

Dewi Setyorini            : Bud, wis yah mene ki kowe durung adus?

Budi Santoso              : Durung, wong isih diagem siram Bapak ngono kok.

                                      Bocah-bocah kok wis padha cemruwet lan gemrudug.

                                      Saiki wis jam pira ta, Mbak?

Dewi Setyorini            : Jam setengah pitu.

Budi Santoso              : Mbak, Mbak Dewi wis duwe klambi anyar?

Dewi Setyorini            : Huh, kaya cah cilik wae, Bada ndadak nganggo klambi

                                      anyar. O iya, Bud, mengko sida sowan Pak Susilo apa

                                      ora?

Budi Santoso              : Ya sida ta, Mbak, ning budhale mengko rada awan-

                                      awanan wae, ya.

Dewi Setyorini            : Lha iya ngono, saora-orane bubar sungkeman.

Budi Santoso              : Sungkemane rak ngenteni rawuhe Mbak Ratih, ta?

Dewi Setyorini            : Yen rawuhe Mbak Ratih kawanen ya ditinggal wae.

Budi Santoso              : Adate, sungkeman neng kulawargane Mas Untung ki

                                      dianakake luwih esuk tinimbang ing kulawargane dhewe

                                      kene.

Dewi Setyorini            : Jarene Mbak Ratih wingi ya ngono. Sawise sungkeman,

                                      Mbak Ratih karo Mas Untung arep bablas mrene.

Budi Santoso              : Mbak Dewi lagi masak apa apa, ta?

Dewi Setyorini            : Genah lagi nggoreng emping ngono kok.

Budi Santoso              : Sing sijine kuwi lho?

Dewi Setyorini            : Opor bebek. Galo kae, Bapak wis rampung sirame, kana

                                      gek adus.

Budi Santoso              : Inggih, Ndara Putriiiiii.

(kapethik saka buku Wiwara, Harimurti Kridalaksana-F.X. Rahyono, Dwi Puspitorini-Supriyanto Widodo-Darmoko)